Մարտի 18-20-ը Երևանում տեղի ունեցավ Տնտեսական համագործակցության և զարգացման կազմակերպության Բուդապեշտում մրցակցության հարցերով տարածաշրջանային կենտրոնի (OECD-GVH RCC) «Մրցակցային մարմինների գործիքակազմը՝ ուղղված աճի և բարեկեցության խթանմանը» թեմայով սեմինարը։ Միջոցառմանը մասնակցում էին մրցակցային մարմինների և միջազգային կազմակերպությունների շուրջ 40 ներկայացուցիչներ տարբեր երկրներից, բանախոսները՝ Իտալիայի, Իսպանիայի, Ռումինիայի, Պորտուգալիայի, Ալբանիայի մրցակցային մարմինների և ՏՀԶԿ-ի ներկայացուցիչներն էին։
Կենտրոնի տնօրեն Մարիա Պիլար Կանեդոն իր խոսքում շնորհակալություն է հայտնեց Հայաստանի մրցակցային մարմնին՝ սեմինարը Երևանում կազմակերպելու համար, հավելելով՝
«RCC-ի սեմինարները սովորական համաժողովներ չեն։ Այս սեմինարների միջոցով մենք ստեղծել ենք մրցակցության փորձագետների ընտանիք, և այսօր ձեզանից շատերը պատկանում են, ոմանք էլ միանում են այդ ընտանիքին, որը սկսել է գործել 20 տարի առաջ»։
«Մենք բարձր ենք գնահատում Կենտրոնի հետ մեր երկարատև համագործակցությունը։ Այս տարիների ընթացքում Հանձնաժողովի ներկայացուցիչներն ակտիվորեն մասնակցել են կազմակերպված սեմինարներին, որոնց միջոցով կուտակել են արժեքավոր գիտելիքներ և գործնական հմտություններ, ինչը կարևոր աջակցություն է մեր առօրյա աշխատանքում»,-ընդգծել է ՄՍՇՊՀ անդամ Շուշան Սարգսյանը՝ ողջունելով միջոցառման մասնակիցներին։
Սեմինարի երեք օրերի ընթացքում բանախոսներն անդրադարձան այնպիսի հարցերի, ինչպիսիք են մրցակցային օրենսդրության կիրարկումը, համակենտրոնացումների գնահատումը, շուկաների վերլուծությունը և մրցակցային մշակույթի խթանումը՝ ազատ շուկաներում մրցակցային հավասար պայմանների ապահովման, նորարարարության զարգացման և հասարակության բարեկեցության խթանման նպատակով։
Քննարկվեցին նաև հիպոթետիկ գործեր՝ մասնակիցների մասնագիտական հմտությունների գործնական կիրառությունը կատարելագործելու նպատակով։
