ՄՊՀ նախագահ Գեղամ Գևորգյանը մասնակցել է Տիրանայում տեղի ունեցած Ալբանիայի մրցակցության օրենքի 20-ամյակին նվիրված եռօրյա համաժողովին: Համաժողովի ամփոփիչ նիստում Գեղամ Գևորգյանը որպես խոսնակ հանդես է եկել միջազգային համագործակցության հարցերով պանելային քննարկմանը, որը վարում էր Ալբանիայի մրցակցային մարմնի նախագահ Դենար Բիբան:
Բացի Հայաստանից, քննարկմանը մասնակցում էին նաև Հունաստանի, Հունգարիայի, Վրաստանի մրցակցային մարմինների ղեկավարները:
Քննարկման մասնակիցները ներկայացրել են իրենց գերատեսչությունների փորձը որոշումների կայացման գործընթացում միջազգային համագործակցության կարևորության, երկրների միջև փորձի և տեղեկատվության փոխանակման առավել նախընտրելի միջազգային հարթակների և ձևաչափերի, դատարանում գաղտնի տեղեկատվության օգտագործման, չհայտարարագրված համակենտրոնացումների համար նախատեսված տուգանքների չափի և այլ հարցերի շուրջ:
«Միջազգային համագործակցության բոլոր ձևաչափերը կարևոր են և արդյունավետ: Կարծում եմ, ամենավատ համագործակցությունը համագործակցության բացակայությունն է։ Մեզ անհրաժեշտ են շարունակական ջանքեր՝ մրցակցային մարմինների միջև ավելի ներառական և ակտիվ համագործակցության զարգացման ուղղությամբ, ինչը իրապես կարող է նպաստել գլոբալ մարտահրավերների հաղթահարմանը և առավել փոխկապակցված ու համագործակցող աշխարհի ստեղծմանը»,- իր խոսքում մասնավորապես նշել է Գեղամ Գևորգյանը:
ՄՊՀ նախագահը ներկայացրել է միջազգային գործընկերների հետ համագործակցության Հայաստանի մրցակցային մարմնի ունեցած դրական փորձը՝ մասնավորապես հիշատակելով BOOKING.COM B․V․ ընկերության նկատմամբ հարուցված վարույթը, առցանց տաքսի ծառայությունների ոլորտում իրականացված ուսումնասիրությունը և այլն:
