Մրցակցության պաշտպանության հանձնաժողովի անդամ Անուշ Բեղլոյանը և ՄՊՀ նախագահի խորհրդական Հրայր Արամյանը փետրվարի 16-17-ն առցանց ձևաչափով մասնակցել են Կազանում անցկացվող ԱՊՀ երկրների Հակամենաշնորհային քաղաքականության միջպետական խորհրդի գովազդի հարցերով կոորդինացիոն խորհրդի 23-րդ նիստին:
Նիստի ընթացքում ՄՊՀ անդամ Անուշ Բեղլոյանը ներկայացրել է զեղչերի և այլ ակցիաների գովազդին առնչվող, ինչպես նաև անբարեխիղճ գովազդից անչափահասների պաշտպանության հարցերի վերաբերյալ ՀՀ օրենսդրական կարգավորումները:
Իր խոսքում Անուշ Բեղլոյանը մասնավորապես անդրադարձել է հանձնաժողովի նախաձեռնությամբ ընդունված և 2022 հուլիսի 31-ից ուժի մեջ մտած զեղչերի և այլ ակցիաների հետ կապված նոր կարգավորումներին, այդ թվում՝ դրանց իրազեկմանը ներկայացվող պարտադիր պահանջներին, որոնք վերաբերում են ինչպես իրացման կետերում, այնպես էլ էլեկտրոնային և սոցիալական մեդիայի միջոցներով տարածվող գովազդին: Անդրադարձ է կատարվել նաև գովազդի միջոցով հասարակության մոլորեցման դրսևորմամբ անբարեխիղճ մրցակցության համար հարուցված ուշագրավ վարույթներին:
ՄՊՀ նախագահի խորհրդական Հրայր Արամյանը ներկայացրել է ՀՀ ֆինանսական ծառայությունների ոլորտում գովազդին առնչվող գործող օրենսդրական կարգավորումները:
