ԱՄՆ Առևտրի դեպարտամենտի Առևտրային օրենքի զարգացման ծրագրի (CLDP) շրջանակում այսօր ՀՀ տնտեսական մրցակցության պաշտպանության պետական հանձնաժողովի աշխատակիցները մասնակցել են «Գերիշխող դիրքի չարաշահման բացահայտման և կանխման» թեմայով վեբինարին:
ԱՄՆ դաշնային առևտրի հանձնաժողովի հետ համատեղ իրականացվող այս ծրագիրը նպատակաուղղված է Հանձնաժողովի աշխատակիցների կարողությունների զարգացմանը, միջազգային լավագույն փորձի ընդօրինակմանը և ՀՀ մրցակցության օրենսդրության կիրարկումը խաթարող օրենսդրական բացերի բացահայտմանը:
Միջոցառման սկզբում ողջույնի խոսքով է հանդես եկել ՀՀ ՏՄՊՊՀ անդամ Տիգրան Մարկոսյանը: Նա նախ շնորհակալություն է հայտնել ԱՄՆ Կառավարությանը, ծրագրի պատասխանատուներին և բոլոր նրանց, ովքեր ներգրավված են եղել ծրագրի մշակման և իրականացման աշխատանքներում:
Տիգրան Մարկոսյանը հույս է հայտնել, որ ԱՄՆ Առևտրի դեպարտամենտի Առևտրային օրենքի զարգացման ծրագրի (CLDP) և ԱՄՆ դաշնային առևտրի հանձնաժողովի մասնագիտական փորձառությունը, տեսական ու պրակտիկ գիտելիքները, կիրառվող մեթոդաբանությունն ու մոտեցումները գերիշխող դիրքի չարաշահման հնարավոր դեպքերի բացահայտման առումով իրապես օգտակար կլինեն ՏՄՊՊՀ աշխատակիցների համար և հնարավորություն կտան բարձրացնելու աշխատանքների արդյունավետությունը, բարելավելու կայացվող որոշումների որակը, ինչն իր հերթին նաև կնպաստի չարաշահումների կանխարգելմանը:
