«Սպառողի Օգնականը» Մրցակցության պաշտպանության հանձնաժողովի կողմից մշակված թվային գործիք է, որը հնարավորություն է տալիս․
- ներկայացնել առցանց բողոք ապրանքի կամ ծառայության հետ կապված խնդիրների վերաբերյալ անմիջապես տնտեսավարող սուբյեկտին,
- Ստանալ ծանուցումներ բողոքի կարգավիճակի և ընթացքի մասին,
- Ստանալ պատասխաններ էլեկտրոնային փոստի միջոցով,
- Օգտվել Հանձնաժողովի աջակցությամբ մշակված պարզ և հասանելի բողոքարկման հարթակից։
Եթե Դուք առնչվել եք խնդիրների, ինչպիսիք են օրինակ՝ առաքումների ուշացումները, ապրանքի վերադարձի կամ երաշխիքի հետ կապված խախտումները, կամ գնել եք ապրանք, որը չի համապատասխանում անհրաժեշտ չափորոշիչներին և այլն, կարող եք Ձեր բողոքը ուղարկել համապատասխան տնտեսավարող սուբյեկտին Հանձնաժողովի անմիջական աջակցությամբ։
Ինչպես է աշխատում այս գործիքը.
- Ընտրում եք Ձեր խնդրին համապատասխանող ձևաթուղթը,
- Լրացնում եք անհրաժեշտ տվյալները և կցում հավաստող փաստաթղթեր (օրինակ՝ ՀԴՄ կտրոն, պայմանագիր),
- Նշում եք տնտեսավարող սուբյեկտի էլ․ փոստի հասցեն (եթե Դուք դժվարանում եք էլ․ փոստը գտնելու հարցում, Հանձնաժողովն ինքը կլրացնի),
- Համակարգն ինքնաշխատ եղանակով կձևավորի Ձեր բողոքը՝ հասանելի դարձնելով այն Հանձնաժողովին, որի միջոցով էլ այն ուղարկվում է տնտեսավարողին,
- Տնտեսավարողը ունի 14 օր Ձեր բողոքին արձագանքելու համար՝ պատասխան նամակով հայտնելով բողոքում բարձրացված խնդրի լուծված լինելու փաստը կամ չլուծման հետ կապված հիմնավորումները,
- Պատասխանը ուղարկվում է ինչպես Ձեզ, այնպես էլ Հանձնաժողովին,
- Նշված ժամկետը լրանալուց հետո Դուք ստանում եք դրա մասին ծանուցող հաղորդագրություն Ձեր էլ․ փոստի հասցեին,
- Պատասխան չստացվելու կամ խնդիրը չլուծվելու դեպքում Դուք հնարավորություն ունեք տեղեկացնելու այդ մասին Հանձնաժողովին՝ ներկայացված բողոքների էջից սեղմելով «բողոքարկել» կոճակը։
- Այս պարագայում Ձեր բողոքը՝ կից նյութերով կարող է ուղարկվել Հանձնաժողովի հետ համագործակցող հասարակական կազմակերպություններին կամ իրավաբանական ընկերություններին՝ դրա հետագա ընթացքն ապահովելու համար։
Օրենքով նախատեսված դեպքերում Հանձնաժողովը կքննարկի բողոքով ներկայացված խնդրի առնչությամբ վարչարարություն իրականացնելու հարցը։
